دا بوست من"نقابى عفتى وكرامتى" عرفت طريقة سهلة ممكن اى ام تعملها والحمد لله داومت عليها وجابت نتيجة ... الاول لازم نعرف ان الطفل لما ينطق ال ((ك)) بيستسهل وينطق ال ((ت)) ولما ينطق ال ((ج)) بردو يستسهل وينطق بداله ال ((د)) ح...رف ال((ك)) يخرج من اقصى اللسان يعنى اخر اللسان عند اللهاة وال ((ج)) يخرج من وسط اللسان مع سقف الحلق الاعلى والطفل بيجيب السهل ويبدلهم بحروف ممكن يتحكم فيها بطرف لسانه فبيرفع طرف اللسان لاعلى وينطق بدلهم ال((ت)) وال ((د)) المطلوب ايه تجيبى خافض اللسان او معلقة صغيرة او اى حاجة الطفل يحبها وتكون صغيرة متملاش فم الطفل كل الى عليكى انك تحطى طرف المعلقة او خافض اللسان عند طرف لسان الطفل بكده هتمنعيه انه يرفع طرف لسانه لاعلى عند النطق وتبدأى معاه وتقوليله قول معايا ته ته ته تا تا تا متقوليش ك الهدف انه ينطق ((ت))من غير ما يرفع لسانه من الاول مش هيعرف وهتلاقيه اخترع حروف جديده نقرتين لعرض الصورة في صفحة مستقلة بس بالتدريب والمداومة دقائق يوميا ان شاء الله ممكن بعد 6 ايام هتلاقى ايييييييييييه هتلاقى ال ((ك))طلعت والله العظيم هيكون يوم منور فى حياتك كانك استخرجتى من ارضك دهب هههههههه المهم تشجعى الطفل اول ما يقولها وتعرفيه ان ده النطق المطلوب لانه لا يملك انه يطلع النطق ده النطق بيطلع لوحده لا اراديا لاننا اجبرناه ومسكنا طرف لسان علشان كده اول ما ينطق حرف ال ((ك))صح نشجعه جدا جدا وطبعا الطفل فى الاول ممكن يتعب ويزهق ويخاف كمان فانتى اعمليها كانها لعبه هو يعملك شويه ويمسك طرف لسانك بالمعلقة وانتى تعمليله شويه وان شاء الله هتشوفى النتيجة بس استعينى بالله واصبرى على ولادك ال((ج)) بئة سهله مش محتاجة تمرين هى بتطلع لوحدها والطفل بيقدر يقولها لوحده بعد ما يتمكن من نطق ال((ك)) طبعا بعد كده تتابعى طفلك فى كل الكلمات الى فيها الحروف دى وتعدلى عليه نطقها علشان يعرف يقولها صح كمان ابقى لقنيه كلمات كتير فيها الحرفين ال((ج)) وال ((ك)) وبالتوفيق انا حبيت احط تجربتى وفكرة قريت عنها وعملتها ويا رب ينتفع بيها غيرى .
